اساسيات الجافا وشروط التعريف تابع للمقدمة

week 3Lec#2-JavaBasics(I)

 

بسم الله الرحمن الرحيم

السلام عليكم ورحمة الله وبركاته

زي ما شفنا في التدوينة الي قبل هذي شرحنا مقدمة بسيطة او مدخل في البرمجة وصار عندنا صوره مبدئية لها

 

هالمره راح نتكلم اكثر في الشروط الي لازم نتبعها عشان نكتب برنامج ناجح وصحيح بدون اغلاط

 

وزي ماهو واضح كتبت لكم فوق عنوان الجزء الي انا فيه عشان تبدون تتابعون معي في الملزمة

 

يالله على بركة الرحمن نبدأ :

 

اول شيء راح نتكلم عن برنامج الجافا بعدها بندخل في اساسياته .

 

في البرمجة غالباً مافيه شيء موحد لازم الكل يسويه في طريقة حل المشكلة فيه اشياء اساسيه لازم نكتبها لكن اتكلم عن طريقة الحل بتكون على حسب المبرمج نفسه يختار الطريقة الي يرتاح لها اكثر , مثل الماث تماما يكون عندنا مسألة وحدة لكن لها اكثر من طريقة حل وكل طريقة طبعا لها قوانينها واساسياتها , ف لازم ننتبه للأساسيات ونبدع بالطريقة على كيفنا , البرمجة تحتاج تدريب كثير عشان تقدر تحفظ الأخطاء وتحفظ الأساسيات وتصير واضحه لك .

برمجة 1 جدا جميلة وممتعة لا يلعبون عليكم ويقولون صعبة كانت جد شيء جميل , وغالباً الاستاذ هو يسهلها ويصعبها لكن هنا بكون معكم واحاول ابين لكم وش قد سهله ولطيفه وممتعة .

 

اول نقطة راح نتكلم عنها هي comments

هذي التعليقات لها اهمية كبيرة في البرمجة خاصة للي يسوي برنامج ويجي احد بعده يكمل عليه مثلا ف خاصية اضافة تعليق تتيح للمبرمج شرح وش قاعد يسوي بالضبط في هالجملة ووين وقف ووش بقي واي شيء يبي يكتبه يقدر عادي .

التعليق ماله أي شروط تقدر تكتب على راحتك وقد ماتبين لكن بشرط تحطين بداية السطر دبل سلاش // اذا حطيتي هالعلامة كأنك تقولين للبرنامج انا الحين قاعدة اكتب تعليق لا تدقق علي .

 

واذا تعليقك الي بتكتبينه طويل واكثر من سطر ف تكتبين

/* ……………………………………………………

……………………………………………………*\

 

وهذا مثال في البرنامج

 

طيب بعدها تكلم لنا عن ال Syntax Error

وقال لنا ان لها ثلاث تسميات اخرى غير اسمها ولازم تنتبهون عليها وتحفظونها لانها مهمة لا تسحبون عالمربع هذا (اقصد في الملزمة )

 

طيب وش معناها : هي الاخطاء الي ما يقدر compiler او المترجم انه يفهمها او يقراها ويعتبرها غلط في البرنامج وبيطلع لك تنبيه انك غلطتي في هالسطر ونسيتي شيء مهم او نقصتي حرف او او او .

 

فيه شيء ثاني اسمه: logical errors

وهو ايضاً اخطاء لكن ما يطلع لنا البرنامج تنبيه عليها وعادي بيكمل البرنامج لكن اذا سوى run بتكتشف ان عندك خطأ .

هذا النوع اصعب من الي قبله لانك بتقعد تدور وين الغلط بنفسك ما راح يحدده لك البرنامج .

 

بعدها تكلم لنا عن ال Keywords او الكلمات المحفوظة في الجافا والي ممنوع نستخدمها ك تسمية لأي شيء واذا استخدمناها في غير اماكنها راح يقول لك Error علطول الي هي اربع اسماء :

1. Public
2. Static
3. Void
4. Class

 

 

بعدها تكلم لنا عن شروط المعرفات او ال identifier

ولها شروط دائمة لازم نتبعها الي هي :

الجافا حساس جداً لحالة الأحرف بمعنى لو عرفتي المتغير ب Hessah وجيتي بتسوين له استدعاء او تستخدمينه ما ينفع تنادينه hessah بيقول لك خطأ لانه حسب الاسكي كود ف الحرف H في البرمجة غير الحرف h ف انتبهو لهالنقطة .

 

وغير كذا الاسم ما يبدأ ب رقم ولا يكون فيه مسافات في التسمية ونقدر نستخدم رموز محددة مثل (_) ($) .

 

ولو عندك اسم يتكون من اكثر من كلمة مثلا تقدرين بس تسوين كذا (HessahAlhassanLesson)

 

وكذا نكون خلصنا شروط التسمية وننتقل للنقطة الي بعدها .

 

اخيراً خلص الجزء النظري وببدأ اشرح كيف نكتب برنامج وبنزل لكم فيديو من اول مانفتح البرنامج واعلمكم ايش الاساسيات الي لازم تحفظونها زي اسمكم واشياء ثانية .

 

ببدأ الحين الشرح العملي واسوي الفيديو واذا ممداني اخلصه اليوم بكمل بكره ان شاء الله وانزله لكم بإذن الله .

كنت قايلة لكم ان هذي التدونية بتكون عالجزء العملي لكن اكتشفت ان الملزمة فيها كلام يحتاج تفصيل لانه مهم.

(الترجمة مب حرفية هي على فهمي للموضوع  ولو فيه اي خطأ غير مقصود صححوا لي )

تنوية ( التدوينة غير معدة للنشر والبيع ولا احلل من يستخدم الدروس لبيعها )

الحمدلله رب العالمين والصلاة والسلام على سيد المرسلين نبينا محمد وعلى اله وصحبة اجمعين ان اخطأت فهو مني ومن الشيطان وان اصبت فهو توفيق من الله سبحانه , اذا استفدتي من المعلومات السابق ذكرها اذكريني ووالدي ومن احب بدعوة في ظهر الغيب .

والسلام عليكم ورحمة الله وبركاته .

حصة الحسن .