طريقة قراءة الخطة والجدول بالتفصيل بالاضافة الي طريقة معرفة اوقات الشعب قبل بدء موعد الحذف والاضافة ;*

السلام عليكم ورحمة الله وبركاته .

كيفكم جميعاً ان شاء الله بخير , من كثرة الاستفسارات في الاسك عن اوقات الشعب وكيف نسوي جدول ومانعرف اختصارات المواد ووو …الخ

راح اشرح لكم هنا كيف تعرفون اوقات المواد خطوة خطوة بالتفصيل بس ركزوا معي بالشرح الله يرضى عليكم .

ملاحظة : الشرح للبنات الي تخصصو التحضيري المستجدات راح تنزل جداولكم تلقائياً .

 

نبدأ بسم الله :

اول شيء نروح نشوف الخطة حقتنا , من وين نجيب الخطة ؟

نروح موقع جامعة الاميرة نورة > من فوق العمادات والكليات > نختار كليتنا > من فوق نختار الاقسام التعليميه > نختار من قسمنا معلومات اكاديمية > واخيرا الخطة .

لقينا خطتين وحدة قديمة ووحده جديده وش نختار ؟

البنات المستجدات للتخصصات يعني الي الحين بيبدون مستوى اول يختارون الخطة الجديدة الباقين على حسب وش مشيتوا عليه الترم الماضي كملوا يعني الي درست على الخطة القديمة تختارها والي الجديدة تختارها .. ماشين لحد هنا ؟ طيب نكمل

اذا فتحنا الخطة مليانه كلام ومعلومات مافهمنا وش ناخذ منها

طيب اول شيء راح نلقى رؤية ورساله واهداف ومعلومات ثانية ننزل تحت بنلقى متطلبات الكلية متطلبات القسم متطلبات التخرج ننزل تحت لين نلقى الخطة الدراسية اخيراً .

طبعاً كل بنت تمشي على مستواها الي مستوى اول تشوف خطة مستوى اول وهكذا , كيف نقرأ الخطة ماعرفنا فيه رموز وكلام ماينفهم ؟

 

طيب في الصورة الي فوق هذي مكتوب اسم المقرر تحرير كتابي طيب , الرمز والرقم : عرب 101 م , يعني اختصار مادة التحرير الكتابي عرب 101 وانتي مطالبة في الخطة الدراسيه حقتك تدرسين هالمادة طيب , ساعات الاتصال يعني كم ساعه تاخذين هالمادة في الاسبوع العرب بس ساعتين نظري يعني مره وحدة في الاسبوع , ومالها متطلب سابق طبعاً , ماشين لين هنا تمام ! طيب نكمل

 

 

طيب ركزوا هنا مطلوب مني ادرس فيز 202 م في المستوى الثاني وحطيت لكم خط احمر تحت المتطلب السابق , يعني ايش متطلب سابق يعني ما تقدرين تدرسين فيز 202 لين تخلصين فيز 101 وهو مطلوب منك في المستوى الاول ( ارجعوا للصورة الاولى تلقونة في الفقرة الثالثة ) ماشين لين الحين تمام , وشرحت لكم الخطه وكيف نقراها ..

 

يالله الحين نكمل بعد ماعرفنا خطتنا ووش مطلوب مننا ندرسة نجيب ورقة وقلم ونروح لموقع الجامعة > النظام الاكاديمي > الجدول الاسبوعي > نختار الفصل الدراسي > نختار القسم او المادة الي نبيها > بعدين نضغط الجدول الدراسي

 

طبعا هنا كل شيء شرحته عالصورة , اسم الدكتوره مكتوب رموز مكانه معناتها ما بعد قرروا من يدرس هالشعبة .

هنا بكتب لكم معاني الايام :

U : الاحد

M : الاثنين

T : الثلاثاء

W : الاربعاء

R : الخميس

هنا كيف نقرأ اسم الشعبة :

الرقم الي تحته خط احمر هذا المستوى يعني هالشعبه مستوى اول

اسم هالشعبة M1

 

 

هنا كيف نقرأ رقم الكلاس :

1/ كلية العلوم الدور الارضي كلاس رقم 506

2/ كلية العلوم الدور الاول كلاس رقم 417

طيب خلصنا الحين كيف نقرأ الجدول

بعد مانرتب جداولنا ونختار المواد ويعجبنا خلاص نكتب الارقام المرجعية الي حددتها في الصورة الي فوق في الورقة

واذا جا وقت الحذف والاضافه حسب التواريخ المعلنة في عمادة القبول والتسجيل هنا

 

راح انزل لكم شرح ثاني ان شاء الله عن كيف نضيف المواد ونحذفها .

ان شاء الله يكون هالشرح وافي بذلت فيه جهد عشان تفهمونه زين وماتضيعون فيه كلكم ..

 

اي اسئلة اكتبوها لي في التعليقات وراح ارد عليكم ان شاء الله هنا او اكتبوا لرنا في الاسك بس ان شاء الله معد نلقى اسئلة مجاوبتها هنا بالكتابة والصور 😦

 

بالتوفيق للجميع والله يسهل عليكم .. والسلام عليكم ورحمة الله

 

حصة الحسن ()

 

 

الإعلان