تجربتي ف السنة التحضيرية اول حاجه تخرجت من الثانوية بنسبة مو ذاك الزود على قولتهم يعني تقريبا كانت نسبتي 82 طبعا غير القدرات والتحصيلي وهالاشياء ما اكذب عليكم اول ماشفت نسبتي انصدمت قلت أي جامعة راح تقبلني ونسبتي كيذا المهم اختبرت قدرات وتحصيلي وكانت مركبتي 75 قدمت على الجامعات ولا انقبلت ف ولا جامعة حتى جامعات القرى قدمت عليها ولا قبلوني طبعاً انا حاطه ف بالي دارسة جامعة دارسة بإذن الله راح ادخل حتى لو نسبتي مو ذاك الحد طبعا مرت الأيام وفتح التقديم اليدوي وانا أهلي ولله الحمد من الناس إلي مايحبون يقللون مني حتى لو كنت ماجبت معدل ولا انقبلت كان الكل فالبيت يشجعني ويقول لي شهد راح تنقبلين حطي أملك بربي كنت لما اسمع كلامهم اتشجع أكثر وأكثر حتى جدتي ربي يطول بعمرها كانت دايم تقول انتي الحين ليش زعلانه أن شاء الله ب تدخلين للجامعة وبتدرسين وبنفرح فيك وبشهادتك أهلي كان لهم دور كبير في اني أكون قويه وتكون نظرتي متفائلة طبعا فتح التقديم اليدوي ورحت وقدمت أوراقي وانا عندي أمل كبير بربي انو راح انقبل قدمت ف جامعة الإمام وقدمت ف جامعتنا ولله الحمد بعد العيد جتني رسالة القبول ورحت كملت أوراقي وصرت من طالبات جامعة الأميرة نورة طبعا ماتتخيلون فرحتي وقتها حسيت اني سويت إنجاز بحياتي ممكن تسألون كيف انقبلت أو يمكن عندها واسطه علشان كيذا مشت أمورها لا وربي واسطتي ربي ودعوات أهلي ولما مشيت على قاعدة (تفائل بما تهوى يكن) دخلت الجامعة وكنت متخوفه من العالم الجديد الي راح ادخل فيه فالبدايه كنت ف حالي أحضر المحاضرات واطلع ما اعرف ولا أحد وكنت أحاول قد ما اقدر أشد حيلي تعرفت على وحده مهمله واهملت معها وصرنا نسحب على الكلاسات ونزلي حرمان فالانجليزي وكان معدلي الترم الاول ضعيف جبت 2 وقلت راح أشد حيلي الترم الثاني وفعلا شديت على نفسي قد ما اقدر وجبت 3 المهم أن الثلاثة حقت الترم الثاني مارفعتني وصار معدلي 2.70 والحين باقي لي مادة الي هي الإنجليزي راح ادرسها هالترم وبعدها راح أكون دبلوم طبعا انا مو طموحي دبلوم ابد ف أن شاء الله اني راح أشد حيلي وراح ارجع أكمل بكالوريوس لاني تعلمت ان الفشل هو أول محطة في طريق النجاح أتمنى أنكم تستفيدون من تجربتي واتمنى من كل قلبي انكم تتفائلون ب أنفسكم ولا تقللون من قدراتكم لأن مافي شي مستحيل بهالدنيا بعزيمتنا واصرارنا وقربنا من ربنا راح يكون كل مستحيل ممكن
تفائل بما تهوى يكن،’♡
* شهد الغامدي
Las Group 