لآس ; ملامحه و الرؤية الحقيقية له + الخطة الميدانية + الخطط المستقبلية* (رابط مُحدث فيه تفاصيل الكرت)

السلام عليكم ورحمة الله وبركاته

صباحكم سكر , كيفكم جميعا  , وان شاء الله متحمسين للجامعة ومتفائلين بترم جميل وسهل ومتيسر ان شاء الله

بعد تفكير طويل جدا ف كيف ننظم خطة ميدانية ممتازة

وصلت لفكرة وحده ! وان شاء الله توصل لكم مثل ما تصورتها براسي

بنات جامعتنا كلهم فيهم خير, كلهم متحمسين يسوون اي شيء يساعد غيرهم , كلهم متعاونات , وحبيبات , ويدخلون القلب علطول , بأختلاف اشكالهم والوانهم واساليبهم , بنات جامعتنا عائلة وحدة  , وقلب واحد , دايم موجودين في الهاشتاق يساعدونا , وموجودين بالجامعه حولنا , نشوف  بعض في الجامعة  كل يوم , ونعيش الاشياء والروتين نفسه مع بعض كل يوم , الاشياء الي تجمعنا مع بعض محد يعرفها غيرنا , وجامعتنا محد له حق يتكلم عنها غيرنا ; لأننا احنا بناتها وسمعتها من سمعتنا وهي المكان الي سواء حبيناه او لا راح نروح له ونجي كل يوم لمدة 4 سنوات اقل شيء , بنعيش فيها خبرات وتجارب حلوة , وممكن احيانا صعبة علينا , لكن بنتخطاها وبيجي اليوم الي تودعين الجامعة وانتي فخورة بنفسك انك تخرجتي منها بمعدل عالي , بتنسين كل شيء شين وبس بتبقى معك الذكريات الحلوة فيها …

خلاصة الكلام , وبما اننا بنطول فيها , نبي نرتاح فيها , ونبي نكون مبسوطين , نبي نتعامل فيها ك عائلة وحدة واخوات جد , كلنا نعاني من الزحمة ,وكلنا نتفق اننا مانبي زحمة المترو, وزحمة المصعد , وزحمة خدمات الطالب , كلنا نتفق اننا نبي النظام في الطوابير , ونبي الهدوء في المكتبه , كلنا نتفق اننا نبي نجلس في مكان نظيف , كلنا نتفق اننا نبي نرتاح من كل شيء يسبب لنا ازمة ونبي البساطة والراحة في كل شيء …

بنات جامعتي محتاجين احد يبادر , فقط !

في كل مكان محتاجين مبادرة واذا شخص بدأ راح يلقى الناس تستجيب له لأنهم معانين مثلكم

بالنسبه لخطتنا الميدانية بتكون ” مبادرة ” لحد يسألني كيف !

كل وحده فينا بتبادر بالصح في المكان الي هي فيه

في المترو تتبع الاسهم والنظام ولو شافت زحمة ترتب البنات

لا تقولين استحي ! هذا الصح ولازم نسويه

دخلتي الكلية اتبعي نظام الدخول والخروج فيها في كل مكان لازم ننتظم ومانكسر النظام

في المصعد كذلك نفس الشيء , ننسى شيء اسمه نزاحم الناس اي مكان يصير فيه فوضى ويحتاج تنظيم مانقول وش دخلنا !

احنا الي بنعيش الشيء ونعاني منه ف احنا الي لازم نصلحه , المشكلة مننا وفينا كل بنت تبي الشيء لها وتبي تخلص اشغالها لحالها بدون ما تراعي الباقين عشان كذا يصير فوضى بكل مكان !

اوك انا معكم ممكن تستحين او منتي جريئة كفاية عشان تنظمين طوابير وتنظمين بنات ! نظمي نفسك وبس انتي يا بنت لاس بالذات لازم تتبعين الانظمة , لاننا ندعوا للإيجابية والتفاؤل واتباع الأنظمة من سمات الأشخاص الإيجابيين ()

طيب نجي للمضمون الأساسي للخطة :

طبعا بنات لاس راح يكون عندكم محاظرات وانا عارفه هالشيء , لكن بالوقت الي تمشين بأسياب الكلية وانتي مخلصه من محاظرتك او طلعتكم التيتشر انتي مطلوب منك تلبسين كرت لاس وتشوفين من محتاج مساعدتك وتساعدينه اذا شفتي بنت ضايعه دليها او احد محتاج مساعدتك بأي طريقه قدميها .

طيب يعني بس كذا نساعد مافيه شروط ؟

من اكثر من سنة كنت ابحث عن مكان اقدر اتطوع فيه بدون ما يقولون تعالي عندنا , او ادفعي كذا , او لازم شروط صعبة عشان اكون عضوة مالقيت شيء اقدر اتطوع بنفسي بذاتي , اتطوع بفكرة , بإبتسامة , بمعلومة , في مكاني بدون تعب بدون جهد بدون شروط وتكلف !

لاس بس راح يوجهكم للأماكن الي محتاجه تعديل والناس الي محتاجه مساعده والباقي عليكم , كل بنت بأسلوبها بطريقتها تتطوع .

خططنا ماراح يكون فيها تكليف على احد , ولا فيها خرق للقوانين , مافيها شيء يمشي عكس الناس ولا شيء يثقل عليك .

بس مجرد انك تكونين معطاءة , تساعدين الي حولك لو بس تمدين لشخص منديل او تفتحين الباب للي وراك , تقولين كلمة حلوة لشخص محبط .

الاسلوب , الاسلوب , الاسلوب اهم شيء عندي اسلوبنا مع بعض ومع البنات الي يسألونا لازم يكون مريح , لازم يخلي البنت الي سألتني ما تستحي من سؤالها , ولا تحس انه غبي , لازم اخليها تتفائل وتتشجع وما احطمها , ولازم ابين لها اني مرتاحه وانا اجاوب عليها ومبسوطة ومستعده لسؤال ثاني وثالث ورابع منها بكل رحابة صدر , لازم أعلمها ان هالترم بيكون جميل جدا اذا هي حبته وتقبلته وعاشته زي المغامره , حسسوهم بالتشجيع وخلوهم يتفائلون حسسوهم بالبساطه وحببوهم في الجامعه .

الموضوع ممتع وسهل وما راح يتعبكم راح تحسون بالإنجاز العظيم لما تساعدون بنت كانت كل الاجازه شايله هم شيء سهل مره مثل خايفه تضيع او كيف تلقى كلاسها او ماعرفت تقرأ  الجدول  او متحطمة او فيها رهبة المكان الكبير والروتين الجديد 😦

لحد يجيني يقول اخاف اسجل وبعدين يصير لي ظرف ومقدر اشارك معكم ! او انا ما اقدر لاني ابي اركز بدراستي ! لان لاس ابداً مب هدفه انك تتركين اولوياتك عشانه ولا تضغطين نفسك , وقتك في الجامعه روتينك نفسه تماما لكن فقط تكثرين من الكلام الايجابي بينك وبين نفسك وتكونين ايجابيه , وتتبعين الانظمة , اذا ماتقدرين تنفعين غيرك يكفي تنفعين نفسك فقط , اذا انتي ما كنتي سبب في الزحمة وفلانه وفلانه وفلانه خلاص ما راح نتزاحم ابداً .

ابداً ما يحتاج مجهود انك تدخلين مع الباب المخصص للدخول وتطلعين مع باب الخروج في الكلية والمحطة , ابدا مافيه جهد وخربطة لدراستك وحياتك اذا وقفتي عند المكان المخصص للأنتظار في المترو والمصعد , ابدا ابدا مافيها عناء عليك .

لحد يسألني عن تصريح ! التصريح ما ينعطى على هالاشياء ! هي تصرفات شخصيه مفروض نسويها مب ممنوعه عشان نطلب تصريح !

التصريح ناخذه عشان ندخل شيء للجامعه عشان نسوي اجتماع كبير في المسرح مثلا عشان نسوي حملة اما نساعد غيرنا ونمشي عالنظام هذي مالها تصريح !

كل ما كبر قروبنا بان التغيير اكثر ، وراح نعمل بمبدأ احمد الشقيري في خواطر 10

ان التغيير يبدأ من الفرد اولاً فتتغير المجتمعات تالياً ، لو كل فرد اصلح نفسه سينتج لنا مجتمع صالح ان شاء الله .

طبعا احب اتكلم عن نقطة مهمة ,  لا تقولون خلي الهاشتاق #las_pnu ! لاس مب شيء للجامعة ! لاس فقط بدايته من الجامعة وفيها , لكن طموحنا ننشر التغيير خارج الجامعة وتكون الدائرة اوسع واي شيء غلط نصححة بنفسنا .

بنات لاس كلهم قلب واحد بنتعاون معكم لآخر درجة وبنساعدكم وتستفيدون مننا ونستفيد منكم وفخورين بهالعدد الي وصلنا له فخورين ان فيه بنات كثير تفكيرهم ايجابي ويطمحون لنشر الخير ,  هذا نبلٌ شديد منكم ، سعيدة جداً بكم وفخورة فيكم ، صدق الي يشوف حماسكم  هذا الي بدون اي مقابل يعرف ان الدنيا لا زالت بخير ولا زال فيها ناس تحب الخير وتحب تساعد لو بأقل شيء تملكه وتتبرع بوقت فراغها ومعلوماتها للي يحتاجونها ، الله يجزاكم خير ولا تنسون دايماً تذكرون نفسكم بالنية الصالحة وتعتبرون هالعمل صدقة لوجه الله ونشر للعلم والمعرفة وتفريج كربة ، الله يجزاكم كل خير ويسعدكم السعادة الأبدية ويجمعنا فيكم في جنات النعيم ، واني احبكم في الله

 

بالنسبه للكرت : صممنا الكرت وبيكون مقاسه A6 سويته وطبعته لكم وبس بتستلمونه جاهز تكلفته 6 ريال وفيه مكتوب اسمك وكليتك واذا كنتي مشرفة في الاسك او مساعده بيكون مكتوب بعد .

راح ارسل لكم طريقة التسليم والوقت بالايميل ان شاء الله ()

تلبسينه كل الترم خطتنا ماهي لاسبوع فقط خطتنا دائمة بإذن الله ()

وماراح اقفل التسجيل حاليا ولا افكر اقفله ف لا تقولون : عادي اسجل ولا اكتفيتوا ؟

كثرت كلام لكن قد مافيني احاول تكون الصورة واضحه لكم وتكونون على بينة , ان اخطأت في كلامي فهذا مني ومن الشيطان وان احسنت فهذا بفضل ربي ()

استودعتكم الله ويوم جميل لكم ,  مؤسسة لاس : حصة الحسن *

الإعلان