شرح Algorithm و Pseudo Code و Flow charts بالتفصيل المفصل مع حل مثال للتوضيح.

السلام عليكم ورحمة الله وبركاته

كيفكم جميعاً ان شاء الله بخير وعافية

انا جداً سعيدة بتفاعلكم وكلماتكم ادخلت السرور الى قلبي , بإذن الله اليوم راح اكمل الشرح الي بديته الاسبوع الي فات , اعرف اني متأخرة لكن لو جا متأخر بعد اختباراتكم راح يفيدكم بالفاينل ان شاء الله

وبيفيد البنات الي بعدكم ()

 

طيب انا برجع اول اوضح الفرق بين ال

Algorithm و Pseudo Code و Flow charts في النقاط التالية :

• ال Algorithm : نكتب فيه خطوات البرنامج بلغة يفهمها اي شخص لا يدرس حاسب ولا يعرف عنه بحيث اي احد يقراه يفهم برنامجك عن ايش

 

• ال Pseudo Code : نكتب ال Algorithm لكن بإختصار ورموز للتسهيل على المبرمج في كتابة ال Flow charts والاكواد .

 

• ال Flow charts : رسم بياني لتوضيح سير البرنامج ويكون تمثيل رسمي لل Pseudo Code وله اشكال محدده لكل شكل معنى خاص فيه .

وبشرح لكم على المثال الموجود بسلايدات اللاب هنا تلقونه :

week 3 Lab#1_Problem solving

على فكرة اتعمد احط لكم فقط مكاني في أي سلايد مع اني اقدر اصور السلايد واحطها هنا , لكن ابيكم ترجعون لها وما تعتمدون اعتماد كلي على شرحي لاني اخاف اهمل نقطة ما اشرحها اكون فاهمتها واعتبرها شيء بديهي وانسى اقولها لكم ( من غير قصد طبعاً ).

 

 

يالله نكمل : السؤال طلب منكم تسوون خطوات برنامج يحول درجة الحرارة من فهرنهايت الى درجة مئوية

• يعني Algorithm

طبعا بهالنوع من الاسئلة راح يتطلب منك الحل 3 خطوات :

• تسوين Algorithm : يعني تكتبين خطوات البرنامج بالتفصيل بلغة عادية ( واقصد بعادية يعني بدون رموز واختصارات عشان الكل يقدر يفهمها حتى لو يقراها طفل صغير راح يفهم برنامج وش راح يسوي مب بالضبط لكن بيفهم وش مطلوب وكذا ” طبعا طفل معه لغة انجليزية وذكي ” )
• اذا خلصتي من كتابة ال Algorithm بيكون طويل وحكي واشياء وك مبرمجه مستحيل تدخلين هالكلام كله ببرنامجك راح ياخذ منك جهد ووقت ومساحة وكلش , ف راح نسوي زي في الرياضيات يختصرون العبارات الرياضية ب علامات هم يفهمونها مثل بدل ما يكتبون كل شوي ما لا نهاية راح يحط لك هالشعار ( ∞) وانتي بتفهمينه علطول لانك تدرسين رياضيات, وهذي الخطوة اسمها Pseudo Code .

• بعد هذي الخطوة نحتاج نمثل الخطوات عن طريق الرسم وهالخطوة اسهل في فهم البرنامج واستيعابه وتخليك تضمنين انك ما تغلطين فيه لان مسارات الرسم واضحه وحلو مره حتى ان شاء الله اذا جيت اشرح السلايدات الاخيره للIF وغيرها راح نعتمد عالرسم في الفهم لانه اوضح ويبين الفروقات بشكل اسهل وحتى يكون زي الخريطة الذهنية لك , انصحكم تستعملونه دايماً لبرامجكم و اسم هالخطوة  Flow charts .

طيب بعد ما وضحت لكم الخطوات بالتفصيل المفصل , نبدأ نحل المثال عليه .

زي ما قلت السؤال طالب تصميم خوارزمية لبرنامج يحول لك من فهرنهايت لدرجة مئوية .

ف وش بنسوي ؟؟ نسوي الخطوات الي فهمناها تو ؟ طيب شلون !! يالله نشوف ..

 

– Algorithm 

1/ Read Fahrenheit

2/Calculate  Celsius

Hint:

(Celsius = 5/9*(Fahrenheit_32)

3/ Display  Celsius

ملاحظات :

فيه بنات بتقول ما عندي لغة كيف بكتب Algorithm ومن هالكلام , راح اقول لك اكتبي اسهل كلمة تدل عالشيء الي تبينه مثلا زي ما تشوفون خطواتي كتبتها بأسهل طريقة ومفهومه جداً , الترجمة :

1- اقرأ الفهرنهايت

2- احسب الدرجة المئوية وحطيت القانون الي بيستخدمة بالحساب

( طبعا القانون راح يكون موجود بالسؤال مب انتم تخترعونه )

3- اعرض الدرجة المئوية . وتقدرين تكتبين Print ( اطبع )  بدال Display

طيب بعد هالخطوة نبدأ نحول ال Algorithm الى Pseudo Code بهالطريقة :

– Pseudo Code

1/ Read F

2/ Calculate C

( C= 5/9*(F_32

3/ Display C

طيب شفتوا مجرد اختصرت المسميات عشان اذا جيت اكتبها في البرنامج بدال ما اكرر الكلمة كلها كم مره اعوض عنها بحرف واحد وبس .

نكمل للخطوة الاخيره قبل كتابة الاكواد الي هي :

– Flow charts :

وهذي الرسمة طبعا مب من كيفي اخترت الاشكال , هم موضحين لكم اشكال ثابته نمثل بها الاوامر في

Flow charts

الي هي :

– بيضاوي للبداية والنهاية .

– متوازي اضلاع لل input  و ال output ( المدخلات والمخرجات )

– مستطيل للعمليات الي بنسويها او المعالجة الي بنسويها للمدخلات عشان تطلع لنا المخرجات .

– معين للعمليات الي فيها شرط ولها اتجاهين اما صحيح واما خاطئ ( بنفصلها اكثر بالسلايدات الجاية ان شاء الله )

– الاسهم لتوضيح المسار ومهمه جدا لا يمكن التغاضي عنها .

وبس كذا نكون خلصنا شرح هالجزئية الحمدلله وبإذن الله تكون واضحه جدا جدا لكم كلكم واسفه اني تغاضيت عنها ورحت للي بعدها بدون تفصيل فيها . شكرا للبنت الي نبهتني عليها وخلتني افصلها لها وانتبه للغلط الي كتبته في التدوينة الي قبل بحيث اني دمجت ال Algorithm و Pseudo Code .

اي استفسار عالدرس تقدرون تستفسرون تحت بالتعليق او عالكيك : 9o9ah_a .

ونحط الخاتمة كالعادة :

(الترجمة مب حرفية هي على فهمي للموضوع  ولو فيه اي خطأ غير مقصود صححوا لي )

تنوية ( التدوينة غير معدة البيع ولا احلل من يستخدم الدروس لبيعها ويمكن النشر مع حفظ الحقوق لي ولمدونة لاس )

الحمدلله رب العالمين والصلاة والسلام على سيد المرسلين نبينا محمد وعلى اله وصحبة اجمعين ان اخطأت فهو مني ومن الشيطان وان اصبت فهو توفيق من الله سبحانه , اذا استفدتي من المعلومات السابق ذكرها اذكريني ووالدي ومن احب بدعوة في ظهر الغيب .

والسلام عليكم ورحمة الله وبركاته .

حصة الحسن .

 

الإعلان