البرنامج اسمه My homework واضح من اسمه وش وظيفته المهم انه يمديك تسجل كلاساتك متى تبدأ او عندك واجب للكلاس او الماده الفلانيه او اختبار او مشروع والخ .. طبعًا مسويلك اكثر من اختيار
هو يذكرك انه عليك شيء لازم تسويه ولو تبغى انه يذكرك قبل الموعد اللي انت حاطه بساعه او يوم او غيره عشان تنفذ الواجب وماتنساه
^من احدى حسابات مواقع التواصل الاجتماعي
الاقتباس من الطالبة مريم القباني
بنات اللي بالجامعه و منحاسة مرة و ما تقدر ترتب مواعيدها و اوقات محاظرتها و الواجبات استخدموا هالبرنامج جدا جميل والله ساعدني كثير السنة اللي راحت
.
.
١/ تدخّلين جدولك و يصير ينبهك بأوقات المحاظرات .
٢/ يحسب لك عدد غياباتك من اول الترم و ينبهك كم وصلتي و متى بينزل لك حرمان حسب جدولك و عدد ساعات كل مادة تاخذينها هو يحسب تلقائي .
٣/ تقدرين تحطين الواجبات اللي عليك و المهام و الاختبارات و تحطين تنبيه مثلا قبل باسبوع و ينبهك
.
.
قلت افيدكم و بس والله
^من احدى حسابات الانستقرام
ومقتبس من الطالبة مريم القباني
nouf alzurbatan..
nouf alzurbatan..
nouf alzurbatan..
السلام عليكم 
أولًا أعرفكم بنفسي: روابي الوهيّب من مواليد ١٩٩٦ تخصصي الحالي: صيدلة اكلينيكية
ثانيًا إذا احد بيسألني هل ما انتي عليه الآن رغبتك وشيء تمنيتيه او لا؟
بقول الحمدلله كثيراً حالي حال أي طالبة كانت محتاره وش تدخل وما تدري بالضبط وش تبي وش يناسبها وايش الأفضل لها!
وصراحةً ما كنت من البنات الي هوسهم يصيرون دكتورات بس كنت من البنات الي هوسهم يكونون شيء كبير بالمستقبل وشخص يُفتخر فيه ويساعد الناس
فدخلت دورات كثير عشان اعرف رغبتي وسألت كثير وقريت كثير وشديت حيلي بمذاكرة القدرات والتحصيلي وطلعنا بنسبة عالية الحمدلله بعدها استخرنا وقدمنا على الصحي والحمدلله دائمًا
١- هل كانت جامعة الأميرة نورة ( المسار الصحي ) اختيارك الأول ؟ اذا نعم لماذا ؟
صراحةً لا كانت الرغبة الثانيه نظرًا ان الجامعة جديدة وما كنت اعرف عنها الشيء الكثير والي يوفيها حقها، بس الحق ينقال لو يرجع فيني الوقت حطيتيها رغبتي الأولى
٢- ماذا كان انطباعك عن السنة التأسيسية قبل بداية الدراسة ؟
اول انطباع ممكن ياخذه اي شخص انقبل بأي جامعة مسار صحي هي الصعوبة الي بنواجها وانعزالنا التام عن الناس وهذا الشيء يخلينا نخاف كثير ونفكر اكثر قبل ما نقبل على هالخطوة، بس صراحة الكلام كان جدًا مبالغ فيه صحيح فيه صعوبة وضيق بالوقت بس هذي الصعوبة راح يواجها اي طالب مُقبل على الجامعة وراح يواجه ضيق بالوقت بس أبدًا مو مثل الكلام الي تسمعونه راح تتعودون؛ لكن ما اخفيكم ان الصحي تعب وضغط اكثر بس صدقوني مع تنظيم الوقت كل شيء بيتسهل بإذن الله، مب سهل بس مافي شي مستحيل
٣- كيف وجدتي اختبار تحديد المستوى ؟ وهل حصلتي على الليفيل المتوقع ؟
كان جدًا سهل حسافة الهم الي كنت شلته بس كان اغلبه قطع وأسئلة عنها مثل وش فهمنا من القطعة السابقة وبعض الاسئلة البسيطة من القرامر
وايه الحمدلله حصلت على الليڤل المتوقع وحطوني مع شعبة تقريبا نفس المستوى الي انا فيه والي تدرسنا عرفت كيف تتعامل معنا وهذا الهدف من الاختبار
٤- انطباعك عن الجامعة والسنة التأسيسية بعد الأسبوع الأول ؟
الحمدلله الجامعة جداً كانت متعاونه معنا من طاقم تدريس ومن عمادة، ومتعاطفة ومقدرة الشيء الي احنا فيه كطالبات مستجدات على الجامعة فكانت تسمع لنا وتحاول تسوي الي تقدر عليه عشان تسهل علينا وسوو لنا لقاء تعريفي نتعرف منه عن الجامعة اكثر وانظمتها ويجاوبون على تساؤلاتنا
واهم شيء وما ننسى البنات خصوصا بنات las والدفع الي قبلنا ما قصروا وقالوا لنا تجاربهم هالشيء خلانا نستفيد كثير
٥- تكلمي عن المواد مع ذكر أيهم وجدتي فيه صعوبات أكثر ؟ ولماذا ؟ وكيف استطعتي التغلب على كل عقبة واجهتك بكل مادة ؟
أولاً : بشكل عام المواد تتفاوت صعوبتها بس اكثر صعوبة واجهتنا اللغة!
لغتك اذا كانت ضعيفة راح تتعبين بس لا تخلين هالشيء يوقفك ابدًا بالبداية صعب لكن مع الوقت راح تشوفين نفسك تطورت لغتك بشكل كبييير
ثانيًا : راح أتكلم عن موادي السمستر الأول (احياء ١٠١- كيمياء-رياضيات-سلم – مصطلحات طبية- إنجليزي)
احياء ١٠١ : المادة فيها قسم نظري وعملي تتكلم عن الأحياء العامة، الي تدرسنا نظري كانت هندية على ما اعتقد المذاكرة من سلايدات (محاضرات) تطبعونها وتجيبونها معكم الكلاس، بداية كان صعب عليها توصل المعلومة لنا وصعب علينا أيضاً نفهمها بس بعدين تعودنا على بعض وعرفنا لبعض والحمدلله مشينا، المادة كانت سهله بشكل عام يبيلها مذاكرة اول بأول كنت قبل المحاضرة احاول أترجم بعض الأشياء عشان يسهل علي اني امشي معها بالشرح بعدين امسكها وأشوف الأشياء الي ما قدرت افهمها وأحاول أفهم نفسي من اليوتيوب وغيره
وهالطريقة عن نفسي نفعت معي
وبالنسبة للعملي ساعة -كل مواد العملي ساعة بالأسبوع- كان محاضرات بعد نطبعها دسم نوعًا ما، نصيحتي ذاكروه أول بأول ولا تستهينون فيه
* ٣ ساعات من المعدل
كيمياء : هالمادة بعد كان فيها نظري وعملي وتتكلم عن الكيمياء العامة واخر محاضرة كيمياء عضوية ايثان وميثان وغيرها، النظري كان اغلبه مسائل فإذا مسكتها قبل المحاضرة أضيع وقت ما افهم شيء، فأحسن طريقة نفعت معي اني اكتب مع الدكتورة اذا شرحت والحمدلله الي تدرسنا كانت جداً ممتازة
اهم شي بهالمادة المذاكرة أول بأول بعد المحاضرة عشان ما تتراكم عليك وحلي المسائل الي يعطونكم وإذا شي ما فهمتيه ارجعي لدكتوراتكم ما يقصرون، المادة سهله شوي بس اسئلتهم دقيقة فركزوا وانتوا تذاكرون
اما العملي كان خفيف ملزمة وتجارب بسيطة وواضحة
* ٣ ساعات من المعدل
رياضيات: أحلى مادة بالنسبة لي والي تدرسنا كانت تخليك تحبين الماث اكثر (هندية اسمها مديحة جداً ممتازة)
المادة بشكل عام تعتمد على الفهم مثل ما انتوا عارفين اهم شيء جيبوا لكم دفتر كبير وحلوا مع حقتكم بعدين أجلسي عليها لحالك راجعيها ورسخيها بمخك ولا يجي الكلاس الثاني الا وانتي فاهمه الي قبل ضروري عشان تمشين
* ساعتين من المعدل
سلم ١٠١ : سلم او الثقافة الاسلامية، كان جدا سهل وتضمنون الA+ فيه ان شاء الله كان فيه ١٠ درجات على مشروع او شرح ، وبيخلونكم تشترون كتاب هالكتاب بيسهل عليكم لان نهاية كل وحدة ملخص
* ساعتين من المعدل
مصطلحات طيبة : اطبعي المحاضرات وترجمة معها هالمادة بالنسبة لي بدايةً كانت علاقتنا مش ولا بد، لان لغتي ما كانت بيرفيكت والكلمات تجيك باللاتينية اغلبها ومعناها بالانجليزي فلازم تحفظين الاثنين لأن المادة بشكل عام كلها حفظ
اصعب شيء فيها ثاني محاضرة كلها مفردات حوالي ١٠٠ كذا الي عليك انك تحفظينهم زي أسمك بيكون صعب بداية وبتاخذ وقت بس قسمي وقتك عليهم اذا حفظتيها باقي المحاضرات بتكون سهله عليك بإذن الله وهالمادة راح تساعدك كثير بالاحياء سواء ١٠١ او ١٠٢ حق السمستر الثاني فركزي عليها
* ساعتين من المعدل
مهن : مادة خفيفة بس كلامها دش ببعض واغلبها حفظ، راح تستفيدون منها كثير نصيحتي بهالمادة ترجمة وفهم اول بأول عشان بالاختبار ما ياخذ منك وقت الترجمة لان مفرداتها الانجليزية جديدة شوي واهم شيء افهموا لأن اختباراتهم كان الكلام ما يجي نصًا
* ساعة وحدة من المعدل
انجليزي : ٣ ساعات يوميا تمر بسرعة، هالمادة على سهولتها الا انها راح تطورك كثيييير وبتستمتعون فيها وبتخليكم تكسبون مهارات من تقديم عروض برزنتيشن وكيفية الحوار وغيره ان شاء الله
* ٦ ساعات من المعدل
ثالثًا: مواد السمستر الثاني (فيزياء-احياء١٠٢- احصاء-سلم ٢٠٢- عرب ١٠١- مهن طبية-أنجليزي)
فيزياء : هالمادة بعد نظامها سلايدات تطبعينها وفيها نظري وعملي ويتكلم عن الفيزياء العامة، النظري بشكل عام سهله ومكررة بالثانوي راح تنعاد عليكم بس بالانقليش، ذاكري المادة اول باول ويتصير سهله عليك ان شاء الله
والعملي بعد كان سهل ملزمة الي عليك بس تفهمين طريقة التجربة
احياء ١٠٢ : المادة هذي بعد فيها نظري وعملي، النظري ما اخفيكم صعب ويبيله مذاكرة وكلام دش ببعض، ركزوا على هالمادة وعطوها من وقتكم كثير ولا تخلونها ابدا تتراكم عليكم انتبهوا!
طريقة المذاكرة من السلايدات والكتاب ركزوا على اسئلة الكتاب الي بآخر كل وحدة جا كثير منها بالميد.
اما العملي بعد ما كان سهل مجاهر وسلايدات وممتع جدًا
ما ابي اخوفكم من المادة بس شدوا حيلك فيها
احصاء : كثير يقولون اسهل من الماث بس بالنسبة لي الماث اسهل، المادة خفيفة بس ركزي مع حقتكم واكتبي ملاحظاتك وحلي معها وراجعي قبل المحاضرة الثانيه الي خذتوه وبتمشين زين
* ساعتين من المعدل
سلم ٢٠٢ : بيخلونكم تطبعون ملزمة ممتع يتكلم عن حقوق المرأة وما الى ذلك بتفيدكم كثير، المادة من ساعتين سهله ان شاء الله لا تشيلون همها
عرب ١٠١ : مادة خفيفة جدددًا اغلبه نحو بيتكلم عن الهمزات والأخطاء الشائعة الي يقع فيها الناس باللغة العربية وجزء بسيط جداً من البلاغة وفيه كتابة بالقواعد الوظيفية من رسالة وغيرها.
وهالموقع فادنا كثير فيه اسئلة وشرح احفظوه عندكم : http://op.pnu.edu.sa/ELearningArabic/home.html
* ساعتين من المعدل
انجليزي : هالترم راح يكون اصعب من الي قبله لأن لغتكم بتصير أقوى ان شاء الله، اغلبه رايتينق تكتبين essay بس لا تخافون الي بيدرسونكم مره متعاونين وراح يساعدونكم
* ٦ ساعات من المعدل
ممكن انكم تاخذون الفيزياء والاحصاء أول ترم وكيمياء وماث ثاني ترم او العكس عادي لأنها مواد تبادل
اخيرا اسفه اني طولت بس قلت لكم كل شي كنت أتمنى اعرفه قبل ما ابدا ان شاء الله يفيدكم
٦- لو عاد بك الزمن .. ماذا كنتي ستغيرين ؟
كنت أتمنى اني ما اسمع لكلام البنات كثير بالنسبة للصعوبة وسهولة المادة لأن كل بنت تختلف قدراتها يمكن يصير سهل عليك وصعب عليها او العكس.
٧- نصائحك لمستجدات السنة التأسيسية ؟
اول نصيحة : نظمووووا وقتكم صدق تنظيم الوقت شيء مهم ولا بتتعبون ولو تلاحظون قبل كل مرة أكرر مذاكرة اول بأول مهمه وهذي تصير مع تنظيمك لوقتك
ثاني نصيحة : لا تسمعون للي حولكم المهبطين حاولوا تكونون مصدر تفاؤل للي حولكم ولنفسكم وساعدوا بعض بالكلاس ولا تبخلون عليهم بمعلومة لو بسيطة عندكم صح فيه تنافس بين الطالبات بس تذكروا دايم “احب الناس الى الله أنفعهم للناس”
ثالث نصيحة : انتبهوا اذا جتكم مرحلة اليئس والتعب تلتفتون لهالسلبية كثير بنات طلعوا من الجامعة من الضغط ما اخفيكم بس صدقوني مع الوقت كل شيء بيتسهل بإذن الله وراح تتعودون هي مسألة وقت لا أكثر
اخر نصيحة : لا تسكتون عن حقكم ابدا شوفوا اغلاطكم بالاختبار اذا كنتم متأكدين من حلكم راجعوا ورقة اختباركم لكم الحق! لو نص درجة لا تسكتون عنها كل شيء يفرق انتم بسنة تحتاجون الربع وإذا نقصتوا باختبار كثير لا تضيق صدوركم وتيئسون حاولوا ترفعون بالاختبار الي بعده وإذا ما قدرتوا بالي بعده وادعوا بالدرجات العالية بالدنيا والأخيرة وربكم قادر سبحانه ثقوا بذلك
٨- لماذا اخترتي تخصصك الحالي ؟
رغبتي الاولى كانت صيدلة لأني أميل لمواد هالتخصص ولما فيه من مساعدة للناس، ونظرتي له كتخصص نادر وجديد وأن شاء الله مستقبله بيكون باهر بإذن الله
وإن شاء الله اكون نفعتكم ولو بشيء بسيط
والله يجعلها سنة خير وبركة عليكم جميعًا وثقوا ان هالسنة بتتعلمون فيها كثير وبتتطور شخصياتكم للأفضل بإذنه
Las Group 